Mipasalig si Cebu Governor Pamela S. Baricuatro nga iyang ipadayon ug palig-onon ang pagpasiugda sa mga dakong imprastraktura nga proyekto sa Sugbo, human sa iyang pagtudlo isip bag-ong chairperson sa Regional Development Council (RDC) Region 7.
“I am really committed to bring big programs and projects to Cebu,” segon ni Gob. Baricuatro.
Usa sa mga proyekto nga iyang gipangandoy nga matapos sa iyang termino mao ang Talisay–Naga Diversion Road, nga karon aprubado na ang feasibility study. Ang maong kalsada makatabang aron makuhaan ang trapiko sa southern corridor nga moagi sa Talisay City, Minglanilla, ug Naga City, pinaagi sa alternatibo nga agianan padulong ug gikan sa habagatan sa Sugbo.
Lakip sa ubang prayoridad ni Gob. Baricuatro ang Metro Cebu Expressway nga magdugtong sa Danao City hangtod Naga City, mga water system projects, ug dugang pang mga diversion roads aron mapalambo ang konektibidad ug paglihok sa ekonomiya sa tibuok probinsya.
Apan, giila sa gobernador nga ang iyang bag-ong posisyon magkinahanglan usab nga mutan-aw siya dili lang alang sa Sugbo, kundili alang sa kalamboan sa tibuok Central Visayas.
Gikatakda siyang manumpa sa bulan sa Nobyembre sa Malacañang atubangan mismo ni Presidente, diin iyang hisgutan ang mga priority infrastructure projects sa rehiyon.
Ang Regional Development Council (RDC) mao ang labing taas nga policy-making body sa rehiyon nga nagkig alayon ug nagmando sa mga programa sa ekonomikanhon ug sosyal nga kalamboan, aron masiguro nga ang mga lokal nga inisyatiba uyon sa nasyonal nga tumong sa paglambo.
Source: Cebu Province PIO
I via Renante Socia Lada