Aron masiguro ang kaluwasan sa mga pasahero nga naggamit sa mga bus terminal sa Sugbo, gipahigayon ang random drug test sa mga bus, PUV, ug taxi drivers, apil na ang mga conductor ug security guard, niadtong Oktubre 29, 2025 sa Cebu South Bus Terminal (CSBT) ug Cebu North Bus Terminal (CNBT).
Ang maong kalihokan, nga gitawag Oplan Harabas “Undaspot”, usa ka inter-agency operation nga gipangulohan sa Philippine Drug Enforcement Agency (PDEA) Region 7 ubos ni Director Joel Plaza, uban sa Cebu Provincial Government, Cebu City Government, LTFRB, LTO, PNP, ug Philippine Coast Guard.
Sa 279 ka partisipante nga gi-screen, pito (7) niini ang nagpositibo sa paggamit og iligal nga drogas. Upat niini gikan sa CSBT — usa ka minibus driver, usa ka conductor, ug duha ka security guard — samtang tulo gikan sa CNBT, lakip na ang duha ka taxi driver ug usa ka bus driver. Ang ilang mga resulta ipasaka pa sa confirmatory test aron makumpirmar ang findings.
Sumala sa PDEA-7 spokesperson Leia Alcantara, aduna na’y mga doktor gikan sa Cebu City Office for Substance Abuse Prevention (COSAP) nga nagsusi sa lebel sa drug dependency sa mga nagpositibo. Ang COSAP team, ubos sa mando ni Executive Director Greg Rodriguez, maghatag og crisis intervention samtang naghulat sa resulta sa confirmatory test.
Gipasabot ni Alcantara nga ang paghatag og tukmang intervention sa mga drug users dako kaayo og tabang sa kampanya batok sa iligal nga drogas. Samtang si Director Plaza mitug-an nga ang mga driver nga magpositibo dili na tugtan magmaneho, ug ang LTO adunay katungod nga mokumpiska sa ilang lisensya.
Source: Cebu Province
I via Renante Socia Lada