Aron mapasayon ang biyahe sa mga pasahero nga mopauli ug mobalik sa ilang mga probinsya, gimando ni Governor Pamela S. Baricuatro ang temporaryong pagsuspenso sa ₱20 entrance fee alang sa mga taxi nga mosulod ug mukuha og pasahero sa Cebu North ug South Bus Terminals karong Oktubre 31, 2025.
Ang maong desisyon kabahin sa pag-obserbar sa All Souls’ Day, diin daghang mga tawo ang magbiyahe aron mobisita sa lubnganan sa ilang mga mahal sa kinabuhi. Tumong niini nga makunhuran ang trapiko ug mas mapadali ang agianan sa mga terminal.
Sumala sa Kapitolyo, kini nga lakang makatabang aron malikayan ang kalangay sa biyahe ug mahatagan og dugang kahapsay ang mga pasahero. Gipaabot usab sa gobernador ang iyang pasalamat sa tanang driver ug pasahero nga magpakita sa disiplina ug kooperasyon.
Ang Kagamhanan sa Probinsya sa Sugbo nagpahinumdom sa tanan nga magtinabangay ug magmatinahuron aron masiguro ang malinawon ug hapsay nga pagsaulog sa Kalag-Kalag 2025.
Source: Cebu Province
I via Renante Socia Lada Renante