Nagpatuman ang Cebu City Government og mas hugot nga mga lakang sa adlaw-adlaw nga operasyon human ideklarar ang Local State of Operational Emergency, aron masiguro ang padayon nga paghatag og serbisyo sa publiko bisan pa sa mga hagit karon.
Ubos sa Executive Order No. 027, gipahimutang ang klaro ug masukod nga mga limitasyon sa paggamit sa kuryente ug aircon sa tanang opisina sa gobyerno.
Gipamub-an ang oras sa paggamit sa air-conditioning lakip ang usa ka oras nga hunong sa udto ug sayong pag-off sugod alas 4:30 sa hapon, samtang gi-regulate usab ang temperatura tali sa 24°C ug 25°C. Gidili usab ang pagpasiga sa dili importanteng suga ug gamit kung wala gigamit.
Sa bahin sa transportasyon, gipakunhod ang paggamit sa mga sakyanan sa gobyerno ug gihugtan ang fuel allocation alang sa dili essential nga mga lakang. Gidasig ang vehicle pooling ug gidili ang pagpaandar sa makina kung naka-idle ang sakyanan. Apan, padayon gihapon ang full operation sa mga frontline services sama sa ambulansya, bombero, kapulisan, garbage trucks, ug disaster response units.
Gipatuman usab ang mas istriktong pagdumala sa tubig ug pasilidad, lakip ang regular nga inspeksyon sa plumbing aron malikayan ang leaks ug pag-usik sa tubig. Kinahanglan usab nga magpatuman ang mga opisina og water-saving practices ug bantayan ang ilang konsumo aron malikayan ang sobra nga paggamit.
Sa pagdumala sa basura, gimando ang mandatory segregation ug pagminus sa adlaw-adlaw nga waste output, lakip ang paglikay sa single-use plastics sa mga opisyal nga kalihokan.
Gitukod usab ang usa ka Emergency Waste Management Task Force aron magdumala sa implementasyon ug mosuporta sa recycling ug composting programs, samtang gidasig ang mga komunidad sa urban gardening aron mahimong mas self-sustaining. Ang tanang opisina gikinahanglan nga motuman dayon niini nga mga lagda hangtod adunay bag-ong pahibalo.
Source: Cebu City PIO
I via Renante Socia Lada