Gilunsad sa Gobyerno sa Lalawigan sa Sugbo ang “Tabang Pangpabaskog Feeding Program” aron matabangan ang mga batang kulang sa nutrisyon ug mapalambo ang ilang panglawas ug performance sa eskwelahan. Ang unang mga benepisyaryo niini mao ang mga estudyante sa Jose Chona Jo Elementary School sa Barangay Cambuhawe, Balamban.
Gipangulohan ni Gobernador Pamela Baricuatro ang paglunsad sa programa human sa pagpirma sa memorandum of understanding uban ni Balamban Mayor Amos Cabahug ug DepEd Cebu Schools Division Superintendent Dr. Senen Priscillo Paulin aron masiguro ang hapsay nga pagpatuman niini.
Naggahin ang Capitol og ₱140 milyon alang sa feeding program ug sa pagdeploy og pito ka mobile kitchens. Sa unang hugna, mokahatag ang programa og masustansiyang pamahaw sa kapin 1,000 ka mga estudyante sa Jose Chona Jo Elementary School.
Sa sunod nga pagpalapad sa programa sa tibuok lalawigan, ang prayoridad nga makadawat sa tabang mao ang mga Grade 2 pupils nga giila sa DepEd nga kulang sa timbang, kulang sa nutrisyon, o adunay risgo sa malnutrisyon. Ang programa modagan sulod sa labing menos 120 ka adlaw ug maglakip usab sa nutritional drinks, regular nga pagtimbang sa mga bata, ug uban pang health interventions.
Lahi sa miaging feeding program, andam na daan ang mga pagkaon nga ipanghatag aron dili na magluto ang mga ginikanan ug magtutudlo. Atol usab sa maong kalihokan, nanghatag ang Capitol og school bags, notebooks, papel, crayons, ug lapis sa mga estudyante gikan sa Kindergarten hangtod Grade 3.