Gidakop sa hiniusang manhunt team sa Cebu Police Provincial Office (CPPO) ang usa ka wanted person nga suspek sa ilegal nga pagbaton og armas atol sa operasyon sa Barangay Linao-Lipata, Minglanilla, Cebu niadtong milabay nga adlaw.
Ang operasyon gipahigayon sa Provincial Intelligence Unit (PIU) sa CPPO uban sa Talisay City Police Station ug Minglanilla Municipal Police Station. Nadakpan ang suspek pinaagi sa warrant of arrest nga gipagawas sa Regional Trial Court Branch 65 sa Talisay City tungod sa paglapas sa Republic Act 10591 o balaod batok sa ilegal nga pagbaton og armas. Gitakda usab ang piyansa nga ₱100,000.
Base sa rekord sa kapulisan, nagsugod ang kaso human sa pagpatuman og search warrant niadtong Nobyembre 29, 2025, diin narekober gikan sa suspek ang usa ka kalibre .38 nga revolver nga walay serial number ug upat ka buhing bala nga walay legal nga lisensya o permit.
Gipasidunggan ni PCOL Abubakar Udang Mangelen Jr., Provincial Director sa CPPO, ang mga operatiba sa ilang malampusong operasyon. Matud niya, padayon nilang palig-onon ang intelligence operations ug manhunt aron madakpan ang mga wanted person ug mapanalipdan ang kaluwasan sa publiko.
Giawhag usab sa CPPO ang katawhan nga magpadayon sa paghatag og impormasyon aron makatabang sa pagsumpo sa kriminalidad sa lalawigan.
I via Renante Socia Lada