Nadakpan sa Police Regional Office–Negros Island Region (PRO NIR) ang gibanabana nga ₱14.6 milyon kantidad sa mga gidudahang kontrabandong sigarilyo atol sa anti-smuggling operation sa Purok Narra, Barangay Malingin, Bago City, Negros Occidental kagahapon Agosto 6, 2026.
Nasikop usab ang usa ka suspetsado nga giila lamang sa alyas “Kev,” 32 anyos, minyo ug lumolupyo sa Zamboanga City. Ang operasyon nagsugod human sa checkpoint sa Barangay Lag-asan diin nasuspetsahan sa mga pulis ang usa ka puting van. Sa ilang inspeksyon, ilang nadiskobrehan ang mga sigarilyo nga gitago ilawom sa mga labhanon. Giingong gikan kini sa usa ka compound sa Barangay Malingin.
Diha-diha dayong miadto ang mga operatiba sa maong compound. Pag-abot nila, duha ka wala mailhing lalaki ang mikalagiw pinaagi sa paglukso sa koral. Sulod sa compound, nakit-an sa mga pulis ang 255 ka kahon sa gidudahang kontrabandong sigarilyo, usa ka puting van ug usa ka puting Mitsubishi Lancer.
Matod ni PRO NIR Regional Director PBGEN Romano V. Cardiño, padayon ang ilang kampanya batok sa smuggling aron mapanalipdan ang kita sa gobyerno ug mapugngan ang ilegal nga patigayon sa rehiyon. Ang tanang nakompisang ebidensya anaa na sa kustodiya sa Bago City Component City Police Station alang sa hustong dokumentasyon ug pagsaka sa angayng mga kaso.
I via Renante Socia Lada