Gitan-aw sa global insurance brokerage firm nga Gallagher ang Cebu City isip posibleng lugar sa ilang sunod nga investment sa Pilipinas, nga mahimong makahatag og kapin 3,000 ka trabaho sa mga Cebuano.
Nakigkita ang mga opisyal sa Gallagher ug mga investor gikan sa India kang Cebu City Mayor Nestor Archival niadtong Septiyembre 21, 2026, aron hisgutan ang ilang plano sa pagpalapad sa insurance ug financial operations. Posibleng sa Cebu IT Park ibutang ang ilang operasyon.
Gipasalig ni Mayor Archival nga andam ang Cebu City sa pagdawat og dugang mga negosyo ug investor. Gipasigarbo usab sa city government ang lig-on nga ekonomiya ug imprastraktura sa siyudad.
Matud sa Cebu City government, ang posibleng pag-abot sa Gallagher makatabang sa pagpalig-on sa Cebu isip usa sa mga nag-unang IT-BPM ug investment hub sa nasod, samtang makahatag usab og daghang oportunidad sa trabaho alang sa mga Cebuano.
I via Renante Socia Lada