Nagpahigayon og tigum ang Cebu City Government ug ang DPWH Region VII kagahapon Agosto 3 aron hisgutan ang mga lakang sa pagpamenos sa pagbaha sa F. Vestil Street sa South Road Properties (SRP), Cebu City.
Gitambongan kini ni Cebu City Mayor Nestor Archival, mga opisyal sa DPWH Region VII, Department of Engineering and Public Works (DEPW), SRP Management Office, ug ilang technical team. Gipresentar sa DEPW ang ilang mga rekomendasyon aron masulbad ang problema sa nagtigom nga tubig sa maong dalan panahon sa kusog nga ulan.
Sumala sa plano, magtukod og dugang nga mga agianan sa tubig ang City Engineering Office uban sa DPWH Region VII aron mas paspas nga moagas ang tubig paingon sa box-type lined canal ug ngadto sa main outfall sa buffer zone.
Gipasiugda ni Mayor Archival nga kinahanglan dayon nga mapatuman ang proyekto aron makatabang sa pagpakunhod sa pagbaha sa maong lugar. Padayon usab ang koordinasyon sa siyudad uban sa mga ahensya aron mangitag praktikal nga mga solusyon sa mga lugar nga pirming mabahaan sa Cebu City.
I via Renante Socia Lada