Trahedya ang nahitabo sa usa ka mall sa Barangay Mambaling, Sugbo City, human nakuryentihan ug namatay diha-diha dayon ang usa ka electrician samtang nagtrabaho sulod sa usa ka department store sa maong establisemento, alas 3:05 sa kadlawon, Oktubre 21, 2025.
Ang biktima giila nga si Elmer Himaya Abad, 45 anyos, minyo, ug residente sa Barangay Giloctog, Barili, Cebu. Sumala sa imbestigasyon sa Mambaling Police Station, nakadawat sila og tawag gikan sa usa ka concern citizen kabahin sa insidente ug dali silang midto sa maong lugar.
Matod pa, giingnan si Abad nga muuli na tungod kay kadlawn na, apan miingon kini nga adunay pa siyang gitiwas nga trabaho. Samtang nagputol siya og mga wire, kalit lang daw misiga ug nakuryentihan, dayon nahagbong gikan sa hagdan nga iyang gigamit. Ang ilang duty magsugod alas 9 sa gabii hangtod alas 5 sa buntag.
Sa pagkakaron, gidala na sa punerarya ang patay’ng lawas ni Abad samtang ang pamilya nagpaabot pa sa resulta sa imbestigasyon ug sa mga lakang nga buhaton sa mall management.
Ang kapulisan nag-awhag sa mga kompanya nga pahugtan ang safety protocols sa trabaho aron malikayan ang parehas nga aksidente nga makakuha og kinabuhi.
📸 Contributed
I via Renante Socia Lada