Nangandam karon ang kagamhanan sa siyudad sa Mandaue sa pag apud-apod sa ayuda para sa mga na apiktuhan sa bagyong Odette niadtong Decembre 2021.
Ang National Housing Authority (NHA) pinaagi sa Mandaue City Social Welfare Services mupagawas sa ayuda karong umaabot Oktobre 16 ngadto sa 19, 2023.
Adunay 12,582 ka mga beneficiaries ang mudawat og tag P10 mil nga naga gikan sa Barangay Subangdaku, Barangay Cambaro, Barangay Bakilid, Barangay Paknaan, Barangay Umapad, Barangay Banilad, Barangay Labogon, Barangay Opao, Barangay Looc, ug Barangay Tipolo.
Dako ang pasalamat ni Mandaue City Mayor Jonas Cortes ug Mandaue City Lone District Representative Emmarie Ouano-Dizon sa tabang pinansyal sa mga na biktima sa bagyo bisan adunay kalangay.
Ang mga mudawat sa ayuda nalakip sa unang tranche ug gilauman nga aduna pay laing hugna sa ayuda labi na kadtong mga grabing naapiktuhan sa bagyong Odette.
Gumikan niini daghan ang nalipay kay bisan sa kalangay aduna gihapon sila’y madawat nga tabang sa kagamhanan.
(Source: Mandaue City PIO, photo credits to the owner)