Usa ka dakong kalampusan alang sa Police Regional Office sa Central Visayas (PRO-7) ang ilang nakab-ot sa pagpangdakop sa ilegal nga drogas nga nagkantidad og dul-an PhP98.4 milyon ug 25 gramos nga marijuana sulod sa 30 ka adlaw isip kabahin sa ilang agresibong kampanya batok sa ginadiling drugas.
Si Police Brigadier General Redrico Maranan, Regional Director sa PRO 7, mipasabot nga kini nga kadaugan usa ka pruweba sa ilang lig-on nga paningkamot sa pagpakgang sa ilegal nga drogas, armas nga walay lisensya, ug sugal, ug sa pagpangdakop sa mga most wanted nga mga kriminal sa rehiyon.
Base sa rekord sa PRO 7, gikan Enero 1 hangtod 31, 2025, nakumpiska sa kapulisan ang 14,471.34 gramos nga shabu nga nagkantidad og PhP98,406,672 ug 25 gramos nga marijuana.
Sa maong panahon, nakahimo ang mga yunit sa PRO 7 og 678 ka operasyon batok sa ginadiling drogas nga misangpot sa pagka-aresto sa 787 ka mga drug personalities. Kini naglakip sa 443 ka buy-bust operations, 168 ka police responses, 25 ka pagpahamtang og warrant, ug 42 ka mga checkpoint.
Gitataw sa PRO-7 nga walay namatay atol sa maong mga operasyon sa rehiyon.
Gipadayag ni PBGen Maranan nga sa tanang nadakpan, 54 ang giila nga high-value targets, 517 ang mga street-level personalities, ug 216 ang bag-uhay lang napailawom sa surveillance. Kini nagpakita sa epektibong pamaagi sa PRO7 aron masiguro ang kalinaw ug seguridad sa Central Visayas.
“As I lead with steadfast determination, the police force in Central Visayas is devoted to our goal of maintaining peace in Region 7. We personify the essence of ‘Makabagong Pulis’, symbolizing modern and progressive law enforcement officers prepared to tackle current challenges with resolve and professionalism,” pamahayag ni PBGen Maranan.
Iyang gibutyag nga ang padayon nga kolaborasyon tali sa kapulisan ug komunidad usa sa ilang lig-on nga estratehiya sa pagpakgang sa tanang matang sa kriminalidad, aron mahatagan ang katawhan og mas luwas ug kasaligan nga palibot.
Source: PRO7-PIO
I via Renante Socia Lada
#rpndykccebu
#675hzamband
#mrpublicservice