Nasikop sa kapulisan ang duha ka tawo nga giingong nagliho og pusil sa Sitio Colo, Barangay Cahumayan, Danao City niadtong Oktubre 2, 2025.
Nakuha sa mga operatiba ang usa ka kalibre .38 nga revolver nga walay serial number, tulo ka wala pa mahuman nga kalibre .45 pistols, usa ka wala pa mahuman nga kalibre .38 revolver, uban pang piyesa sa pusil, ug mga gamit sa paghimo niini sama sa lathe machine, grinder ug steel materials.
Ang operasyon gisugdan human usa ka residente mipahibalo sa kapulisan bahin sa iligal nga kalihokan. Pasalamat ang Police Regional Office 7 ilabi na si Regional Director PBGen Redrico A. Maranan sa maong report nga nakatabang sa pagsakop sa mga suspetsado.
Kasamtangan, anaa sa kustodiya sa Danao City Police Station ang duha ka nadakpan ug giandam na ang kaso batok kanila ubos sa Republic Act 10591 o Comprehensive Firearms and Ammunition Regulation Act.
Giawhag usab sa kapulisan ang publiko nga magpabiling mabinantayon ug motabang sa pagreport sa mga suspek nga kalihokan aron mapadayon ang kalinaw ug seguridad sa rehiyon.
Source: PRO7- PIO
I via Renante Socia Lada