Nakadawat na ang Kapitolyo sa Sugbo ug kinatibuk-ang ₱53,012,962 nga cash donation gikan sa lain-laing indibidwal, organisasyon, ug kompanya nga misuporta alang sa mga biktima sa 6.9 magnitude nga linog nga miigo sa Amihanang Sugbo niadtong Sept. 30, 2025. Ang Provincial Treasurer’s Office maoy nagdumala sa pagdawat ug pagrekord sa mga kontribusyon.
Gipahibalo kini sa opisyal nga Facebook page sa Kapitolyo alas 5 sa hapon, Biyernes, Oktubre 3, 2025. Sumala pa sa pamahayag, ang maong pondo ipang-apod-apod sa mga naapektuhan nga pamilya pinaagi sa koordinasyon sa lokal nga mga panggamhanan sa probinsya.
Dugang pa, nakadawat usab ang Kapitolyo ug in-kind donations nga nagkantidad ug ₱31,719,284.45. Kini naglakip sa mineral water, bugas, de-lata, pagkaon, hygiene kits, medical supplies, ug uban pang hinungdanon nga gamit para sa mga naapektuhan sa kalamidad.
Matod pa sa Kapitolyo, padayon gihapon ang pagdawat sa mga donasyon ug gipasalamatan nila ang tanang mitabang sa probinsya. Gipangayo usab nila ang padayon nga kooperasyon sa tanan aron masiguro nga ang tabang makalapas hangtod sa mga pinaka-apektadong dapit.
Ang Provincial Government sa Sugbo nagpadayon usab sa pakig-uban sa mga ahensya sa nasyonal nga gobyerno, NGOs, ug private sector aron mas mapalapdan ang relief ug rehabilitation efforts sa mga komunidad nga grabe natandog sa trahedya.
Source: Cebu Province PIO
I via Renante Socia Lada