Nakalas ang duha ka tawo human nadasmag ang ilang motorsiklo sa usa ka dump truck sa National Highway sa Barangay Jilocon, San Jose, Negros Oriental, alas 8:25 sa buntag kagahapon Agosto 12, 2026.
Giila ang mga biktima nga sila John Lawrence Ramirez, 25-anyos, taga-Tanjay City, Negros Oriental, ug ang iyang angkas nga si Sam John Sardido, 23-anyos, taga-Barangay Canlargo, Bais City. Sakay sila sa itom nga Yamaha NMAX 155.
Base sa imbestigasyon sa San Jose Municipal Police Station, misulay og overtake ang motorsiklo sa laing motorsiklo. Apan pag-abot sa kurbadahang bahin sa dalan, mitabok kini sa pikas lane ug na-slide. Tungod niini, naligsan ang duha ka sakay ilawom sa nagpadulong nga dump truck.
Ang dump truck nga Howo Sinotruk gimaneho ni John Mark Emberador Cadayday, 26-anyos, taga-Barangay Dansulan, Bais City. Dali nga miresponde ang mga pulis ug mga rescue personnel, apan gideklarar nga dead on arrival ang duha ka biktima.
Boluntaryong mitahan sa kapulisan ang drayber sa dump truck ug anaa na sa kustodiya alang sa tukmang proseso sa balaod. Giatubang niya ang kasong Reckless Imprudence Resulting in Homicide and Damage to Property. Padayon pa ang imbestigasyon sa insidente.
📸 Roy Ortega
I via Renante Socia Lada