Gipahibalo sa National Grid Corporation of the Philippines (NGCP) nga magpatuman og Red Alert sa Visayas power grid gikan alas 6:00 sa gabii hangtod alas 8:00 sa gabii karong Agosto 13, 2026.
Aduna usab Yellow Alert gikan alas 2:00 sa hapon hangtod alas 6:00 sa gabii, ug mobalik gikan alas 8:00 hangtod alas 9:00 sa gabii. Ang available nga power capacity anaa sa 2,283 megawatts (MW), samtang ang peak demand gilauman nga moabot sa 2,360 MW.
Matud sa NGCP, pipila ka power plants ang wala makahatag sa ilang full capacity, samtang 13 ka planta ang nag-operate sa mas ubos nga kapasidad. Sa kinatibuk-an, 903.2 MW nga kapasidad ang dili magamit sa grid. Lakip sa hinungdan mao ang wala paggana sa dagkong coal plants nga TVI 1, TVI 2 ug CEDC 1, limitado nga power import gikan sa Mindanao, ug taas nga gilauman nga panginahanglan sa kuryente.
Ang Red Alert ipagawas kung kulang ang suplay sa kuryente aron matubag ang panginahanglan sa mga konsumidor ug kinahanglanon sa transmission grid. Samtang ang Yellow Alert ipagawas kung gamay ra ang nahibiling reserve o buffer sa kuryente alang sa posibleng problema sa grid.
📸 NGCP
I via Renante Socia Lada