Duha ka centenarian gikan sa ikalimang distrito sa Sugbo ang nakadawat og tag P100,000 matag-usa gikan sa Cebu Provincial Government, gitunol kini, isip pasidungog sa ilang nindot nga kontribusyon sa katilingban.
Si Lola Andrea Tarroja sa Compostela, nga natawo niadtong Disyembre 7, 1924, ug si Lolo Luciano Yuson Wagas sa Liloan, nga natawo niadtong Enero 7, 1924, maoy nakadawat sa maong insentibo. Personal nga gipaabot ni Gov. Gwen Garcia ang ilang tseke atol sa Caravan of Government Services sa lungsod sa Catmon, Pebrero 21, 2025.
Sumala sa ilang pamilya, nakapadayon og himsog nga panglawas ang duha tungod sa ilang maayong pagkaon ug likay sa stress.
Gawas sa pinansyal nga ayuda, ang duha ka centenarian nakadawat usab og adult wheelchair aron mas mapadali ang ilang paglihok ug Abag Sugbo card, nga naghatag kanila og libre nga medikal nga serbisyo sa mga ospital nga gipadagan sa Kapitolyo.
Ang ilang mga guardian o nag-atiman kanila makapahimulos sa Sugbo Kahanas program, diin sila makadawat og libre nga technical ug vocational skills training, base sa ilang certificates of entitlement.
Dugang ayuda nga ilang nadawat: Deputy Speaker Duke Frasco – 10 kilos nga bugas, DSWD – P2,000 ug food packs ug DILG – 5 kilos nga bugas ug tsinelas.
Sa maong kalihokan, uban ni Gob. Garcia ang mga Board Members nga sila si Mike Villamor, Red Duterte, Stanley Caminero, ug Glenn Soco, uban sa iyang anak nga si Miss Carissa Garcia sa Ako Bisaya Partylist.
Mitambong usab ang mga opisyal sa nagkalain-laing munisipyo sa ikalimang distrito, lakip na sila si Catmon Mayor Avis Monleon, Borbon Mayor Noel Dotillos, Carmen Mayor Carlo Villamor, Sogod Mayor Moonyeen Streegan, Compostela Mayor Felijur Quiño, ug Danao City Councilor Migs Magpale.
Kini nga programa sa Kapitolyo nagpamatuod sa padayon nga suporta sa gobyerno alang sa katigulangan ug sa katawhan sa Sugbo. (Renante Socia Lada)
(Source: Cebu Provincial Capitol PIO)