Nikalas og duha ka kinabuhi ang nahitabong sunog kagahapong adlawa, Pebrero 10,2023, didto sa Purok 4, Barangay Tuburan Sur , Dakbayan sa Danao.
Ang mga biktima ila sa kabomberohan sa Siyudad sa Danao nga si Vohn Evanz Bigata, 5 anyos ang panuigon ug ang ig agaw niini nga si Czech Clarence Andales, 4 anyos ang pangidaron, puros sila residenti sa maong lugar.
Sa imbestigasyon nasayran nga atol sa maong sunog si Helen Bigata, ang apohan sa mga bata maoy nagbantay kanila.
Si Bigata nagpundo sa ubos nga bahin sa ilang balay uban sa laing apo sa dihang niulbo ang dako nga kalayo.
Nakasibat siya apan ang duha niya ka mga apo wala na nakuha gumikan sa kakusog sa kalayo.
Nikabat sa walo ka mga balay ang gilamoy sa maong sunog sa naasoy nga lugar.
Sa pagkakaron gisuta pa sa kabomberohan sa maong Siyudad kung unsay hinungdan sa maong sunog ug pila usab ang danyos niini. (Renante Lada, photo credits to the owner)