Duha ka mananagat ang namatay human gikataho nga gidasmagan sa grupo sa mga manakopay gikan sa Pres. Carlos P. Garcia (Pitogo) sa kadagatan duol sa Isla Malingin,Bien Unido, Bohol, kaadlawon sa Biyernes, Mayo 2, 2025.
Ang mga biktima giila nga sila si Rene Reyes y Awas alyas “Ag-ag” ug Bjay Manayon alyas “Bodon,” pulos residente sa Purok 5, Malingin, Bien Unido.
Sumala sa imbestigasyon sa kapulisan, nanagat ang duha gamit ang “liba-liba,” usa ka matang sa illegal nga pamaagi sa pagpangisda.
Nasakpan kini sa mga manakopay ug posible nga maoy hinungdan sa insidente sa pagdasmag. Si Ag-ag dali nga gidala sa tambalanan apan gideklarar nga patay, samtang si Bodon unang gi-report nga missing ug pagkahuman, narekober nga patay na usab.
Padayon ang imbestigasyon sa Bien Unido PNP aron masuta kon kinsa gayud ang mga sakop sa grupo sa manakopay nga gituohang taga-Pitogo.
Gihangyo sa mga otoridad ang mga testigo nga motabang sa paghatag og dugang impormasyon aron makab-ot ang hustisya alang sa mga biktima.
Samtang si Bohol Gob. Erico Aumentado mitanyag kini og P200,000 nga reward sa makatudlo sa responsabli sa maong krimin.
I via Renante Socia Lada