Duha ka managsoon ang namatay human sila madisgrasya samtang nagbiyahe sa motorsiklo sa boundary sa Barangay Balhaan, Badian ug Barangay Madridejos, Alegria, Cebu, niadtong hapon sa Sabado, Marso 8, 2025.
Ang mga biktima giila sa Alegria Police Station nga sila si Ronald Antipuesto, 46, kanhi seaman, ug iyang maguwang nga si Richard Antipuesto, 47 anyos. Pulos taga Barangay Poblacion, Lungsod sa Badian, Cebu.
Base sa inisyal nga imbestigasyon, naggikan sila sa usa ka sabongan sa Alegria ug nagpadulong sa ilang balay sa Barangay Poblacion, Badian. Samtang nagdagan ang ilang motor, kalit nga nawad-an og kontrol ang drayber nga si Ronald, hinungdan nga nahagbong sila sa usa ka box culvert.
Wala mag-helmet si Ronald ug nahampak ang iyang ulo sa usa ka puthaw nga tubo, samtang ang iyang igsoon nalamba usab sa maong tubo.
Gidala pa sila sa ospital sa Badian sa mga niresponde nga emergency personnel, apan gideklarar silang Dead on Arrival (DOA) tungod sa grabeng mga samad nga ilang nadawat. (Renante Socia Lada)