Usa ka 103-anyos nga lola nga taga-Barangay Sorsogon sa lungsod sa Malabuyoc ang gihatagan og P100,000 nga ganti sa Cebu Provincial Government isip pasidungog sa iyang halangdong kinabuhi ug kontribusyon sa iyang pamilya ug komunidad.
Si Lola Anatolia Español, nga natawo niadtong Hulyo 28, 1921, mipadayag nga ang sekreto sa iyang dugay nga kinabuhi mao ang pagkaon og himsog nga pagkaon sama sa isda ug utan, pagpugong sa stress, ug padayon nga pagtrabaho sa umahan.
Dugang pa, nakadawat usab siya og adult wheelchair, bitamina, mga tanom, ug usa ka Abag Sugbo card. Ang maong QR-coded nga card maghatag kaniya og libreng medical checkup ug tambal sa 16 ka provincial ug district hospitals sa Sugbo.
Siya usab ang nakadawat og ayuda gikan sa Department of Social Welfare and Development (DSWD) Region 7 nga naglakip sa food packs ug P2,000 cash. Samtang ang Department of the Interior and Local Government (DILG) Cebu naghatag kaniya og lima ka kilo nga bugas ug tsinelas.
Dugang pa, ang iyang apo nga si Marissa Lumapac gihatagan og certificate of entitlement nga naggarantiya sa iyang slot sa Sugbo Kahanas program sa Kapitolyo, nga nagtanyag og libre nga technical ug vocational training alang sa mga kwalipikadong Sugboanon.
Ang kasinatian ni Lola Anatolia usa ka buhing pamatuod sa kusog ug kalig-on sa mga kababayen-an, ilabi na sa pagsaulog sa Women’s Month, nga nagpakita sa ilang dakong papel sa paglambo sa pamilya ug komunidad. (Renante Socia Lada)
(Source: Cebu Provincial PIO)