Mikunhod ngadto sa 41.50% ang krimen sa Central Visayas alang sa Pebrero 2025, sumala sa pinakabag-ong datos sa Police Regional Office 7 (PRO7).
Gipadayag sa PRO7 nga kini nga positibong resulta gipasiugda sa mas paspas ug epektibong pagpahigayon sa mga polisiya sa kapulisan ug ang lig-on nga partisipasyon sa komunidad.
Ang ilang gipatuman nga comprehensive peace and order operational framework naglakip sa kusog nga presensya sa kapulisan, paspas nga pagresponde, ug epektibong mga kontra-krimen nga estratehiya nga suportado sa katawhan sa rehiyon.
Matod ni PBGen Redrico Maranan, Regional Director sa PRO7, ang aktibong pag-apil sa katawhan usa ka mahinungdanon nga aspeto sa kalampusan sa ilang crime prevention programs.
“These achievements reflect our unwavering commitment to justice and public safety. Under my leadership, we will continue to enhance our initiatives to ensure that Central Visayas remains a region distinguished by peace, order, and security,” segon ni PBGen Maranan.
Sa miaging report alang sa Enero 2025, natala sa PRO7 ang usa ka 66.62% nga pagkunhod sa krimen itandi sa samang panahon sa miaging tuig. Gikan sa 767 nga kaso sa Enero 2024, misaka ngadto sa 256 na lang sa Enero 2025, base sa record sa Philippine National Police (PNP) Crime Information Reporting and Analysis System (CIRAS).
Sa Pebrero 2025, ang walo ka focus crimes mikunhod usab gikan sa 306 nga kaso ngadto sa 179, nga nagpasabot og 127 ka kaso nga pagkunhod o 41.50%.
Sa iyang pamahayag, gibutyag ni PBGen Maranan nga tungod sa proactive policing strategies, nakab-ot sa rehiyon ang labing ubos nga ihap sa walo ka focus crimes kumpara sa miaging tuig. Labi na sa mga insidente sa pagpamusil, nga mikunhod og 41.66%, gikan sa 36 ka kaso sa Enero ngadto sa 21 sa Pebrero.
Matod pa, ang pagpatuman sa mga checkpoint operations, mas lig-on nga police visibility, aktibong pagpapatrolya, ug mas hugot nga law enforcement operations nagpakita sa dako nga kaayuhan sa kahapsay ug kalinaw sa rehiyon.
Gipasiugda usab ni PBGen Maranan ang dedikasyon sa mga police investigators sa PRO7, nga nakatabang sa pag-ila sa mga crime patterns ug potensyal nga mga kriminal, aron malikayan ang dugang pang mga krimen.
Isip pagnapos, gipasabot ni PBGen Maranan sa iyang mga sakop nga magpabilin silang matinud-anon sa ilang serbisyo, mangulo nga may integridad, ug ipatuman ang labing taas nga sumbanan sa serbisyo publiko. (Renante Socia Lada)
(Source: PRO7-PIO)