Nadakpan sa kapulisan ang duha ka high-value individuals (HVI) atol sa usa ka buy-bust operation nga gipahigayon sa Cebu City Police Office (CCPO) sa Barangay Kalunasan, Cebu City, alas 8:39 sa gabii sa Marso 27, 2026.
Ang operasyon gipangulohan sa Guadalupe Police Station 9 ubos sa liderato ni Police Captain Venstine Bontilao, Station Commander, ug sa giya ni Police Colonel George V. Ylanan, Officer-in-Charge sa CCPO. Dinhi nadakpan ang mga suspek nga nailhang alias “Sandra,” 54 anyos, ug alias “Budlat,” 39 anyos.
Narekober gikan sa mga suspek ang gibanabana nga 2.1 kilos sa gituohang shabu nga adunay kantidad nga mokabat og ₱14,382,000. Nakuha usab sa operasyon ang buy-bust money ug uban pang drug paraphernalia.
Ang duha ka suspek karon anaa na sa kustodiya sa kapulisan ug mag-atubang sa kasong paglapas sa Republic Act 9165 o ang Comprehensive Dangerous Drugs Act of 2002.
Gipasabot sa CCPO nga magpadayon sila sa pagpahugot sa ilang kampanya batok sa ilegal nga drogas ug nanawagan sa publiko nga magpabiling alerto ug motabang sa mga otoridad aron mapadayon ang kalinaw ug kaluwasan sa dakbayan sa Sugbo.
Source: CCPO
I via Renante Socia Lada