Patay ang duha ka construction worker samtang usa pa ang naangol human matabunan sa nagkadaiyang sako sa semento nga nangahulog gikan sa taas nga bahin sa usa ka construction site sa A.S. Fortuna Street, Barangay Banilad, Mandaue City alas 9:45 sa buntag, Enero 24, 2026.
Giila sa kapulisan sa Mandaue City Police Office (MCPO) ang mga namatay nga sila si Alfonso Lazaga, 39 anyos, ug Victor Sindey, 54 anyos. Samtang ang naangol mao si John Zel Villafuerte, 24 anyos, nga dali gidala sa ospital ug karon nagpaayo na sa iyang kahimtangan.
Sumala sa kapulisan, kapin sa 20 ka sako sa semento ang kalit nga nangahulog gikan sa taas nga bahin sa construction area ug diretsong nakaigo sa mga biktima samtang nagtrabaho sila sa maong lugar.
Gituohang wala makaikyas ang mga biktima sa nahitabong insidente tungod sa kakusog ug kadaghan sa nahulog nga materyales, hinungdan nga namatay dayon ang duha ka trabahante sa lugar sa panghitabo.
Padayon pa karon ang imbestigasyon sa kapulisan aron mahibal-an ang eksaktong hinungdan sa aksidente ug masuta kung adunay paglapas sa mga safety protocol sa maong construction site, ilabina sa pagdumala sa mga bug-at nga materyales.
Source: MCPO
I via Renante Socia Lada