Nagdeploy og kapin sa 5,000 ka security personnel ang Police Regional Office 7 (PRO7) aron masiguro ang kalinaw ug kahapsay sa ASEAN 2026 Summit nga ipahigayon sa Cebu. Gihimo ang ceremonial send-off sa Citi de Mare, South Road Properties, Cebu City sa Enero 24, 2026.
Ang deployment gisuportahan sa nagkadaiyang kagamitan lakip ang 51 ka patrol vehicles, 50 ka motorsiklo, duha ka PNP Airbus, ug usa ka fully equipped communication van aron paspas ang koordinasyon ug responde sa kahimtang.
Kauban sa PRO7 sa pagseguro sa summit ang AFP, Philippine Coast Guard, BFP, BJMP, ug uban pang ahensya sa gobyerno sama sa DOT, DFA, DTI, DOH, OCD, local government units, ug ubang partner agencies.
Tumong sa panaghiusa ang masiguro ang luwas ug malinawon nga pagdumala sa internasyonal nga kalihokan.
Sumala kang PBGEN Redrico A. Maranan, Regional Director sa PRO7 ug Task Group Commander sa ASEAN Summit 2026, ang mga pulis nga gi-deploy mao gihapon ang nagbantay sa bag-ohay lang nga Sinulog Festival 2026 nga milampos ug walay dakong insidente.
Giingon ni Maranan nga sa miaging unom ka adlaw nga ASEAN meetings sa Bohol, walay natala nga major untoward incident, nga nagpakita sa ka-epektibo sa security plan. Samtang magsugod ang mga kalihokan sa Cebu gikan Enero 25 hangtod 31, gipasalig niya nga andam na ang tanang pwersa.
Gidasig usab ni Maranan ang tanang personnel nga sundon ang mga protocol, magpabiling disiplinado, ug magtinabangay isip usa ka lig-on nga pwersa aron mapanalipdan ang dungog sa nasud atubangan sa internasyonal nga komunidad.
Source: PRO7 PIO
I via Renante Socia Lada