DAPITAN CITY — Gipakita sa City Government of Dapitan ang lig-on nga baruganan sa pagpanalipod sa kabataan pinaagi sa usa ka child protection workshop nga gipangunahan sa City Social Welfare and Development Office, uban sa suporta ni Mayor Evelyn “Belen” T. Uy, niadtong Enero 23, 2026 sa Amphitheater, Government Center. Ang kalihukan naglambigit sa Persons with Disabilities ug senior citizens isip aktibong kaabag sa pagpanalipod sa katungod ug kaayohan sa mga bata.
Gidala ang tema nga “Empowering PWDs and Senior Citizens as Partners in Upholding Child Rights and Protection,” ug gitambongan sa unang hugpong sa mga presidente ug representante sa barangay-based PWD ug senior citizen organizations sa tibuok Dapitan City. Gitutokan sa diskusyon ang balaod sa child protection, juvenile welfare, ug ang hiniusang responsibilidad sa komunidad sa pagsiguro sa kaluwasan sa mga kabataan. Gipatin-aw usab ni CSWDO Head Marilyn S. Sy ang papel sa PWDs ug senior citizens isip duty-bearers sa Barangay Council for the Protection of Children.
Gihatagan og lawom nga pagsabot ang mga partisipante pinaagi sa mga lektyur, open forum, ug group activities nga nagtutok sa aktuwal nga mga sitwasyon sa child protection. Sa pagtapos sa kalihukan, nakadawat og lima ka kilo nga bugas ang matag partisipante isip pasalamat. Ang maong inisyatiba nagpamatuod sa padayon nga paningkamot sa Dapitan City sa pagpalig-on sa child welfare programs, inklusibong partisipasyon, ug responsableng serbisyo alang sa kabataan.(JENIFFER JR. DELICA)
Source: City Government of Dapitan