Ang Mayor sa La Libertad nga si Hon. Liza M. Mejias, nipaambit sa iyang State of the Municipality Address (SOMA) kagahapong adlawa, Pebrero 20, 2025, didto sa Mayor Laertes Z. Sulit Mini Gymnasium, Poblacion La Libertad, Zamboanga del Norte.
Ang maong kalihokan gitambungan ni La Libertad Vice Mayor Romeo J. Mejias, mga personahe sa Philippine National Police, Bureau of Fire Protection,mga opisyales sa Sangguniang Bayan sa La Libertad lakip ang mga sakop sa Media, diin ang nasangpit nga pagpaambit sa halangdong Mayor sa iyang State of the Municipality Address mao ang kalamboan sa iyang mga proyekto sa lungsod sa La Libertad nga unod sa iyang maayong pagdumala sa lungsod ug sa katawhan nga iyang gisakopan.
Sa iyang mahinungdanong mensahe,mapasigarbuhong gitataw ni Mayor Mejias ang nagkalain-laing kalamposan ilawom sa iyang pagdumala pinaagi sa maayong gawi sa pagpakabana ngadto sa mga katawhan nga mapahimuslan ang matag proyekto.
Pinaagi sa iyang pagdumala ug pagpaningkamot nakab-ot sa lungsod sa La Libertad ang hingpit nga kabag-ohan ug mga kalamboan sa natad sa inprastraktura, pag-access sa kalidad sa edukasyon, negosyo ug episyenteng serbisyo sa komunidad.
Pipila sa iyang mga proyekto sa imprastraktura mao ang pagbuhat ug dalan, tulay, pagtukod ug mga pasilidad , pag-upgrade sa La Libertad Rural Health Unit,pagpasigarbo sa Agrikulturang Turismo, pag-implementar sa Gender and Development (GAD) Fund sa Pabahay Program, ug pagpundar sa ekonomikanhong sektor sa Agrikultura.
Dugang pa napa uswag usab niini ang kalampusan ug kaandam alang sa siguridad sa kuminidad pinaagi sa pagpalig-on sa ilang mga lakang, kalamposan sa mga programa sama sa Senior citizens program, Women’s Welfare Program, Barangay Nutrition scholars, Children’s Welfare Program,4P’s Program, Empowerment and Reaffirmation of Paternal Abilities Training (ERPAT) ug uban pa.
Si Mayor Mejias nipadayag sa iyang bug-os nga pasalamat ngadto sa Gobernador ning lalawigan sa Zambonga del Norte nga si Gobernor Rosalina “Nanay Nene” Jalosjos, sa walay pu-as nga suporta ug tabang alang sa pagtukod sa mga proyektong inprastraktura sa lungsod sa La Libertad, diin nigahin kini ug pundo nga P10 Milyones, alang sa pagtukod sa merkado ug laing P11 Milyones nga kantidad sa proyekto alang sa pag kongkreto sa 800 metros nga Probinsyal Road sa Barangay Mauswagon-New Carcar-Sta Cruz.
Dugang pa,gipasalamatan usab ni Mayor Mejias ang pipila sa mga nagpaluyo ug niabag kaniya sa pagpatuman sa iyang plano ug inisyatiba sa pagpalambo sa lungsod sa La Libertad diin kini naghatag ka niya ug dasig sa pagpaningkamot nga mulampos ug magpadayon ang hingpit nga kalamboan nga makahatag ug kaayohan sa mga katawhan sa La Libertad ilawom sa iyang pamunoan.
(Source: Medalyn Borja)