Usa ka dakong kalampusan sa kampanya batok sa ilegal nga drogas ang naangkon sa rehiyon sa Central Visayas human gideklarar nga drug-cleared ang dugang 30 ka barangay, base sa datos sa Philippine Drug Enforcement Agency (PDEA-7).
Sa maong ihap, 26 ka barangay ang pormal nga giaprobahan atol sa deliberasyon sa Regional Oversight Committee on Barangay Drug Clearing Program. Ang mga lugar nga naapil mao ang mga barangay sa Bohol, sa lalawigan sa Sugbo, sa Cebu City, ug sa Mandaue City.
Sumala ni PDEA-7 Information Officer Leia Alcantara, hugot ug lawom ang ilang validation process sa mga barangay nga giila nga limpyo na sa ilegal nga drogas. Gitan-aw kuno niini ang mga lakang sa rehabilitasyon, pagpangdakop sa mga salambigit sa ilegal nga drogas, ug ang kooperasyon sa komunidad.
Sa kasamtangan, 1,968 na ka barangay sa tibuok 3,003 sa Central Visayas ang giilang drug-cleared. Kini usa ka klaro nga timaan sa padayong paningkamot ug epektibong kolaborasyon tali sa PDEA, kapulisan, local government units, ug mga sektor sa komunidad.
Gilauman nga magpadayon ang maong kalambuan aron mas daghan pang barangay ang maluwas gikan sa kadaut nga dala sa ilegal nga drogas.
Source: PDEA-7
I via Renante Socia Lada