DAVAO CITY – Nakaluwas sa usa ka pagpamusil ang usa ka barangay kagawad sa Tibungco, Davao City, human mikagar ang armas sa suspetsadong misulay untang mopusil kaniya.
Ang suspetsado nga nadakpan sa kapulisan giila nga si Archie Gonzales Bayo, 37 anyos, ulitawo, usa ka construction worker nga nagpuyo sa Purok 9, Phase 3, Panuntungan, Tibungco.
Sumala sa report sa kapulisan, nahitabo ang insidente pasado alas 6 sa buntag karong Mayo 26, 2025, sa Purok 13, Tibungco. Paingon na untang mosakay sa iyang sakyanan ang biktima, usa ka 56 anyos nga barangay kagawad, sa dihang giduol siya sa suspek ug gitutukan gamit ang armas.
Apan swerte lang gayud ang kagawad kay mikagar ang armas ug wala ka-boto. Misulay pa og bunot ang suspek sa laing armas apan napugngan kini sa kagawad, hinungdan sa komosyon.
Tungod sa tabang sa anak sa kagawad ug sa mga residente nga anaa sa palibot, malampusong na-disarmahan ug nadakpan ang suspek.
Narekober sa kapulisan ang duha ka armas gikan sa suspetsado: usa ka .38 kalibre nga revolver nga adunay unom ka bala, ug usa ka .45 kalibre nga pistola nga adunay lima ka buhing bala ug usa ka basiyo.
Giandam na karon ang kasong attempted murder ug laing kasong kriminal nga ipasaka batok sa suspetsado. (Camille Santos Naraga)(Source: Contributed)