Gipahibalo sa Department of Trade and Industry (DTI) nga padayon kini sa pagbantay sa presyo sa mga nag-unang palaliton sa Sugbo human ideklarar ang probinsya ubos sa state of calamity tungod sa sunod-sunod nga kalamidad nga miigo sa rehiyon.
Si DTI Secretary Ma. Cristina Aldeguer-Roque maoy personal nga nagpasalig niini atol sa iyang pakigkita ni Governor Pamela Baricuatro sa Cebu Provincial Capitol niadtong Nobyembre 12.
Base sa Republic Act 7581 nga giusab sa RA 10623 o ang Price Act, ang presyo sa mga batakang panginahanglanon sa mga lugar nga giideklarar ubos sa state of calamity awtomatik nga mapabilin sa kasamtangan nga rate o ipailawom sa price control sulod sa 60 ka adlaw, gawas kung kini mahunong og sayo.
Kauban ni Secretary Roque sa maong miting sila DTI Central Visayas Director Esperanza Melgar ug DTI Cebu Provincial Director Marivic Aguilar, samtang si Governor Baricuatro giubanan ni Provincial Administrator Atty. Ace Durano ug Paolo Uy.
Gipahibalo usab ni Secretary Roque nga ang DTI magtukod og Innovation Hub sa Cebu uban sa pakigtambayayong sa Provincial Government. Suportado kini ni Governor Baricuatro, nga misaad sa pag-ila og angay nga yuta nga pagpanag-iya sa Kapitolyo alang sa proyekto.
Ang maong DTI Innovation Hub magtanyag og teknikal nga tabang, startup incubation, digital onboarding, ug investor matching aron mapalig-on ang lokal nga mga negosyante ug mapasig-uli ang inobasyon ug kooperasyon tali sa gobyerno ug pribadong sektor sa rehiyon.
Source: Cebu Capitol PIO
I via Renante Socia Lada