Magpadayon ang Department of Social Welfare and Development (DSWD) sa Central Visayas sa pagdumala sa Social Pension Program alang sa indigent senior citizens, bisan pa sa pagbalhin sa uban pang mga programa sa National Commission of Senior Citizens (NCSC) subay sa Expanded Centenarian Act.
Ubos sa Republic Act (RA) 10868 o ang Centenarian Act of 2016, ang mga Pilipinong muabot sa edad nga 100 makadawat og Php 100,000 nga cash gift ug libreng sertipiko sa pag-ila sa gobyerno.
Sugod karong tuiga, ang programa ibalhin sa NCSC, sumala sa RA 11350, nga naglatid sa pagbalhin sa tanang senior citizen-related functions gikan sa DSWD padulong sa NCSC.
Base sa DSWD-7, gikan sa 2016 hangtod 2022, 1,023 ka mga centenarians sa Central Visayas ang nakadawat sa ilang Php 100,000 nga hinabang, nga mokabat sa total nga Php 102.3 milyon.
Sa maong ihap, 752 ka benepisyaryo (77%) babaye, samtang 231 (23%) mga lalaki.
Tungod sa Expanded Centenarian Act, dugang nga pinansyal nga benepisyo ang gihatag sa mga senior citizens nga mosanong sa 80, 85, 90, ug 95 ka tuig, gawas pa sa Php 100,000 para sa 100-anyos. Ang matag senior citizen nga makaabot sa maong edad, makadawat og Php 10,000.
Samtang padayon ang pagbalhin sa Centenarian Act ngadto sa NCSC, gipahibalo sa DSWD-7 Regional Director Shalaine Marie S. Lucero nga magpadayon ang Social Pension Program nga adunay Php 1,000 nga binulan nga ayuda (o Php 12,000 matag tuig) alang sa indigent senior citizens.
Sa 2024, 259,737 ka senior citizens sa Central Visayas ang nakadawat sa ilang gipadugang nga pension, nga makatabang sa ilang panginahanglan sa matag-adlaw.
Wala pa’y klarong petsa kung kanus-a ipasa sa NCSC ang implementasyon sa Social Pension Program, apan gipasabot sa DSWD nga ila kining padayon nga dumalahan hangtod maklaro ang transisyon.
Kini nga palisiya usa ka dakong lakang aron masiguro nga ang tanang senior citizens sa Central Visayas padayon nga makabenepisyo sa hinabang sa gobyerno.
Source: DSWD-7
I via Renante Socia Lada
#rpndykccebu
#675hzamband
#mrpublicservice