Usa ka 26-anyos nga lalaki nga taga-Barangay Punta Princesa ang misulay og paghikog sa usa ka inn sa Salinas Drive, Barangay Lahug, kagabhion sa Enero 28, 2025. Ang hitabo nahimong viral sa social media human kini nag live sa fb.
Alas-12:15 sa kadlawon, nakadawat og tawag ang Mabolo Police Station 4 gikan sa 911 bahin sa maong insidente. Dayon nga miresponde ang kapulisan, nga gidumalaan ni PMaj. Romeo D. Caacoy Jr., uban sa mga sakop sa CMFC SWAT team nga gipangulohan ni PLTCOL Paterno Domondon Jr., ug Mobile Patrol Unit nga gipangulohan ni PLTCOL Joy G. Leanza.
Sa ilang imbestigasyon, nahibal-an nga ang hinungdan sa buhat mao ang pagkabuwag sa dugay nang uyab sa suspek. Ang kapulisan mipadangat og paspas nga negosasyon aron maluwas ang biktima.
Samtang ang suspek nagkuha sa iyang cellphone, gigamit sa kapulisan ang higayon aron mosulod sa iyang kwarto pinaagi sa balkonahe ug pultahan. Nadakpan siya diha-diha dayon ug narekober ang usa ka .45 caliber nga armas nga adunay usa ka magasin nga may unom ka buhing bala.
Ang suspek gidala dayon sa Mabolo Police Station 4 ug gipasidan-an sa iyang mga katungod. Base sa imbestigasyon, napamatud-an nga ang armas wala’y rehistro, hinungdan nga gikasohan siya sa alarm and scandal, paglapas sa COMELEC Gun Ban, ug sa R.A. 10591 (Comprehensive Firearms and Ammunition Regulation Act).
Nagpahinumdom ang Cebu City Police Office (CCPO) sa kahinungdanon sa mental health ug nag-awhag sa mga katawhan nga nag-atubang og emosyonal nga kalisod nga mangayo og tabang.
Ang hitabo nagpamatuod sa dedikasyon sa kapulisan sa pagluwas sa kinabuhi ug pagsiguro sa kahusay ug kalinaw sa Cebu City.
Source: CCPO
I via Renante Socia Lada