Gawas sa health, ekonomiya, ug trade, gipasiugda usab sa delegasyon sa Cebu Provincial Government ang pagpalig-on sa kasaysayan ug kultura atol sa ilang pagbisita sa Fujian Province, China.
Usa sa pinakamahinungdanong bahin sa ilang cultural immersion mao ang pagbisita sa Rizal Park sa Jinjiang City niadtong Pebrero 6. Anaa dinhi ang 18.61 metros nga monumento ni Dr. José Rizal, ang nasudnong bayani sa Pilipinas, nga nagrepresentar sa tuig sa iyang pagkatawo nga 1861. Kini usab ang pinakataas nga monumento ni Rizal nga naa sa gawas sa Pilipinas.
Sumala sa kasaysayan nga gipakita sa parke, adunay Chinese roots si Rizal. Ang iyang kaliwatan gikan sa Ke family sa Shangguo Village sa Jinjiang, ug giila siya isip ika-22 nga henerasyon sa maong pamilya. Nakigkita usab ang delegasyon sa usa ka miyembro sa Ke family nga ika-30 nga henerasyon, nga nagpakita sa buhi gihapon nga koneksyon sa duha ka kultura.
Giduaw usab sa delegasyon ang lain-laing cultural ug historical sites sa Fujian. Sa Fuzhou, ilang gisuroy ang Three Lanes and Seven Alleys, usa ka karaang distrito nga nagpakita sa tradisyonal nga kinabuhi ug arkitektura sa China.
Sa Zhangzhou, ilang giduaw ang Longjiang Cultural Ecological Park, Urban Exhibition Hall, ug ang Zhangzhou Ancient City, diin makita ang mga karaang estruktura nga naghinumdom sa dato nga kasaysayan sa probinsya.
Bisan pa man sa sayong pagbalik ni Gov. Pam Baricuatro sa Cebu tungod sa pagpangandam batok sa umaabot nga bagyo, padayon gihapon ang delegasyon sa pagdala sa iyang panan-awon sa pagpalig-on sa internasyonal nga relasyon pinaagi sa kultura ug panaghinumduman.
Ang pagbisita sa Rizal Park nagpahinumdom nga ang diplomasya dili lang kutob sa mga miting ug kasabutan, kundili makita usab sa kasaysayan, kaliwatan, ug respeto sa kultura nga naghiusa sa mga Pilipino ug Chinese.
Source: Cebu Province PIO
I via Renante Socia Lada