Mipaabot og kinatibuk-ang ₱4.5 milyon nga pinansyal nga tabang ang Probinsya sa Davao de Oro, ubos sa liderato ni Governor Raul Mabanglo, alang sa 11 ka LGU sa Cebu nga miatubang og dako nga kadaut tungod sa sunod-sunod nga kalamidad sa miaging mga bulan.
Atol sa usa ka mubo nga seremonya sa Cebu Provincial Capitol niadtong Disyembre 2, personal nga gihatod ni Joseph Randy Loy, Provincial Disaster Risk Reduction and Management Officer sa Davao de Oro, ang mga tseke ngadto sa mga representante sa nagkalain-laing LGUs. Si Governor Pamela Baricuatro misaksi sa turnover ug mipasalamat sa maong hinabang.
Sumala ni Loy, gipadala ni Governor Mabanglo ang maong tabang aron ipakita ang dakong suporta ug panaghiusa sa Davao de Oro ngadto sa Sugbo. “Gustong ipaabot ni Governor Mabanglo ang iyang dakong suporta sa Sugbo,” iyang sulti kang Gov. Baricuatro.
Ang ₱4.5 milyon giapod-apod sa mosunod: P500,000 matag usa alang sa unom ka LGUs nga grabe og kadaut — Catmon, Madridejos, Daanbantayan, Bogo City, San Remigio, ug Medellin — samtang P300,000 matag usa ang nadawat sa Sogod, Santa Fe, San Fernando, Tabuelan, ug Borbon.
Nagpasalamat si Governor Baricuatro sa maong panabang ug naghangyo sa Davao de Oro nga ipaabot ang iyang pasalamat ngadto sa ilang gobernador ug katawhan. “Thank you for standing by Cebu especially in this time that we are really down on our knees,” matud niya.
Source: Cebu Province PIO
I via Renante Socia Lada