Pipila na lang ka adlaw sa dili pa ang Pasko, gipalig-on sa Police Regional Office 7 (PRO7) ang ilang mga lakang sa seguridad aron masiguro ang malinaw, hapsay, ug luwas nga selebrasyon sa Pasko ug Bag-ong Tuig sa tibuok Central Visayas.
Sumala sa direktiba sa PNP Acting Chief PLTGEN Jose Melencio C. Nartatez Jr., gipadaghan sa PRO7 ang presensya sa mga pulis ug gi-deploy ang dugang patrol vehicles sa mga terminal sa sakyanan, dagkong dalan, sentro sa negosyo, lugar pang-turista, ug ubang daghang tawong lugar tungod sa gipaabot nga kadaghan sa biyahero ug manglaag karong holiday season.
Matud ni PBGEN Redrico A. Maranan, Regional Director sa PRO7, ang mas hugot nga seguridad kay aron hatagan og kasiguruhan ang publiko, ilabi na karong daghan ang mobiyahe ug magtigom uban sa ilang pamilya. Giingnan usab ang mga hepe sa unit nga planuhon pag-ayo ang pagdeploy sa ilang mga sakop, labi na sa dagkong terminal, aron malikayan ang kagubot ug masiguro ang kaluwasan sa pasahero.
Dugang pa ni PBGEN Maranan, padayon nga susihon sa mga pulis ang kahimtangan sa ilang tagsa-tagsa ka lugar ug ipahimutang ang mga pulis base sa aktuwal nga sitwasyon. Padayon usab ang foot patrols, mobile patrols, checkpoints, ug police assistance desks aron mapugngan ang kriminalidad ug mapadali ang pagtabang sa katawhan.
Gidasig usab sa PRO7 ang publiko nga magmatngon, makigtambayayong sa kapulisan, ug dayon i-report ang bisan unsang kahimtangan nga makaduda. Gipahimug-atan nga importante kaayo ang panaghiusa sa pulis ug komunidad aron mamahimong malinawon ug luwas ang selebrasyon sa Pasko ug Bag-ong Tuig.
Source: PRO7 PIO
I via Renante Socia Lada
#rpndykccebu
#675hzamband
#tandemexpress