Human gipirmahan ni Gobernador Gwen Garcia ang executive order nga nagmugna sa “Anti-Smuggling Inter-Agency Task Force” sa Probinsya sa Sugbo, paspas nga nilihok ang mga otoridad sa Dumanjug ug ilang nasakmit ang mga baboy nga karga sa bangka na pulos walay mga dokyumento.
Ang 79 ka mga buhing baboy nga nasakmit didto sa lungsod sa Dumanjug gikan sa Negros Oriental niadtong nakalabay nga gabii.
Nahimo ang maong operasyon human nakadawat og intelligence ang mga personahe sa Dumanjug Municipal Police Station kalabot sa mga nagsingabot nga mga sakayan nga nagdala og mga baboy nga walay saktong dokumentasyon.
Ang Dumanjug MPS nakig-alayon sa mga kasikbit nga pwersa sa munisipyo, ang Municipal Livestock Coordinator, ug ang Philippine Coast Guard, kinsa miduyog sa grupo sa operasyon.
Sa pag-abot sa lugar, nadiskubrehan sa mga awtoridad ang usa ka giabandonar nga motor banca, uban ang duha ka sakyanan—usa ka Mazda truck ug usa ka Suzuki multicab—nga gikargahan sa mga baboy nga walay dokumento.
Ang walay marka nga banca, ingon man ang mga sakyanan nga adunay plaka nga nakabase sa Sugbo, gikompiskar, ug ang mga baboy gitanggong ug gikustodiya sa mga otoridad.
Padayon ang dugang imbestigasyon aron mailhan ang mga nalambigit sa smuggling operation sa Sugbo.
Niadtong Oktubre 25, 2024 sa gabii, gipirmahan ni Gov. Gwen ang Executive Order Number 16 Series of 2024 nga nagmugna sa “Anti-Smuggling Inter-Agency Task Force” human nakadawat og mga taho nga ang mga baboy nga walay dokumento mosulod sa Sugbo pinaagi sa mga LGU nga nag-atubang sa Negros, apil ang Dumanjug.
Ang hepe sa Police Region Office 7, Brigadier General Anthony Aberin maoy nangulo sa inter-agency task force, diin ang mga mayor sa habagatang kasadpan sa Sugbo isip mga miyembro.
Gawas sa pagkuha sa katungod sa LGU’s sa pagpangolekta og saktong bayronon, ang ilegal nga pagsulod sa mga baboy mahimong makahatag og peligro sa panglawas sa mga Sugbuanon nga konsumidor, tungod kay kining mga baboy makaabot sa merkado nga walay una nga pagtugot gikan sa regulatory body. (Renante Socia Lada)
(Source: Cebu Provincial Capitol PIO)