Dili mominos sa 270 ka mga pamilya, kapin sa gatos ka mga balay ug kapin sa 800 ka mga tawo ang apiktado sa nahitabong sunog didto sa Sitio Isla Alegre, Barangay Basak San Nicolas, dakbayan sa Sugbo.
Ang alarma sa sunog nadawat sa kabomberohan sa Cebu City Fire Station pasado alas 12:18 sa tungang gabii, Oktobre 27, 2024.
Gisaka kini sa unang alarma pagka alas 12:26 sa tungang gabii, ikaduhang alarma pagka alas 12:40, ikatulong alarma pagka 1:41, na under control pagka alas 2:06 sa kadalawon ug na fire-out kini pasado alas 3:25 sa sunod na oras.
Nakasinati og kahagip-ot ang mga ni respondi nga mga bombero sa maong lugar nga paspas ang pagkuyanap sa kalayo.
Sa pasiunang imbestigasyon nasayran nga ang sunog nagsugpod sa balay ni Erlinda Suerte.
Ang maong sunog gi bana-bana nga ni danyos og P3 milyones nga padayon pang gi susi kung unsay hinungdan niini.
Sa pagakaron ang mga biktima sa maong sunog padayong giatiman sa kagamhanan sa siyudad sa Sugbo. (Renante Socia Lada)