Nakab-ot sa Cebu Police Provincial Office (CPPO) ang dagkong kalampusan batok kriminalidad gikan Septyembre 15 hangtod 21, 2025, ubos sa pagpangulo ni PCOL Abubakar Udang Mangelen Jr., Officer-in-Charge, ug giya ni PBGEN Redrico A. Maranan, Regional Director sa PRO7.
Sa sulod lang sa usa ka semana, 51 ka suspek sa iligal nga drogas ang nadakpan ug nakuhaan og 286.17 gramos nga shabu nga nagbalor og ₱1.9 milyon. Nagsilbi usab og 39 ka warrant of arrest ang kapulisan, lakip na ang pagdakop sa 8 ka most wanted persons. Sa kampanya batok iligal nga armas, 12 ka tawo ang nadakpan ug 17 ka armas ang nakumpiskar ug gisurender.
Wala usab kalimti ang kampanya kontra iligal nga sugal diin 13 ka indibidwal ang nadakpan ug nasakmit ang mga gamit ug kwarta nga gigamit. Samtang sa pagpatuman sa mga lokal nga ordinansa, kapin 1,000 ka operasyon ang gihimo nga mitultol sa kapin 500 ka violators nga gipamultahan, halos pareho nga gidaghanon ang giwarningan, ug nakolekta ang total nga ₱236,200 gikan sa penalties.
Kini nga mga kalampusan nagpakita sa padayon ug lig-on nga drive sa CPPO nga nakabase sa ABCD Guide ni PCOL Mangelen – Abide by the law, Build public trust, Commit to integrity, ug Deliver credible results.
Dugang pa, gisuportahan niini ang direktiba ni Gov. Pamela S. Baricuatro nga mas palig-onon ang proteksyon alang sa mga kabus ug mga kabataan batok sa hulga sa child pornography.
Ang CPPO nagpabilin nga masaligon sa ilang misyon nga magpanalipod sa komunidad, magbarug alang sa balaod, ug magpalig-on sa kalinaw ug kahapsay sa tibuok probinsya sa Sugbo. Kini nagpakita sa mensahe ni PBGEN Maranan: “Makabagong Pulis sa Makabagong Panahon, Respetado ang Mamamayan, Disiplinado ang Kapulisan.”
Source: CPPO
I via Renante Socia Lada