Nagpadayon ang kusog nga kampanya sa Cebu Police Provincial Office (CPPO) batok sa kriminalidad human makarekord og dagkong kalampusan sa ilang operasyon gikan Hunyo 8 hangtod Hunyo 14, 2026.
Ubos sa pagpangulo ni Police Colonel Abubakar Udang Mangelen Jr., gipakusgan sa CPPO ang ilang intelligence-driven operations ug uban pang lakang sa pagpatuman sa balaod aron mapadayon ang kalinaw ug kahapsay sa tibuok lalawigan sa Sugbo.
Sa kampanya batok sa ilegal nga drogas, nakapahigayon ang CPPO og 32 ka operasyon nga misangpot sa pagdakop sa 38 ka drug personalities. Nasakmit usab ang 56.55 gramos nga shabu nga adunay kantidad nga ₱384,540 ug nakapasaka og 64 ka kasong kriminal batok sa mga nadakpan.
Dako usab ang nahimo sa kampanya batok sa mga wanted persons. Sulod sa usa ka semana, 72 ka warrant of arrest ang natuman pinaagi sa 51 ka operasyon. Tungod niini, 56 ka wanted persons ang nadakpan, lakip ang lima ka Most Wanted Persons ug 51 ka uban pang wanted persons.
Samtang, sa kampanya batok sa ilegal nga armas, 11 ka tawo ang nadakpan ug 12 ka armas ang nakumpiskar sa 15 ka operasyon. Upat usab ka armas ang boluntaryong gitugyan sa kapulisan ug 12 ka kaso ang napasaka. Sa kampanya batok sa ilegal nga sugal, 25 ka tawo ang nadakpan sa 22 ka operasyon ug nakumpiskat ang ₱4,550 nga pusta.
Gipalig-on usab sa CPPO ang ilang Safer Cities Initiative pinaagi sa OPLAN Bulabog, OPLAN Sita ug Night Watch. Mokabat sa 1,545 ka operasyon ang gihimo batok sa mga nakalapas sa lokal nga ordinansa. Tungod niini, 2,287 ka indibidwal ang gipamulta samtang 1,358 ang gipahimangnoan, nga nakatabang sa pagpalambo sa disiplina ug pagsunod sa balaod sa komunidad.
Matod sa CPPO, ang maong mga kalampusan nagpakita sa ilang padayon nga paningkamot sa pagpugong sa krimen ug pagpanalipod sa katawhan aron mapadayon ang kalinaw ug kaluwasan sa tibuok Probinsya sa Sugbo.
I via Renante Socia Lada