Usa ka suspek ang nadakpan sa kapulisan human makuhaan og giingong gi-karnap nga motorsiklo ug ilegal nga armas atol sa usa ka routine checkpoint operation sa Barangay Poblacion, Pinamungajan sa Hunyo 14, 2026.
Sumala sa report, alas 3:10 sa hapon dihang miduol sa mga pulis nga nagbantay sa checkpoint ang rehistradong tag-iya sa usa ka Honda Click 125 ug mireklamo nga adunay tawo nga naggamit sa iyang motorsiklo nga giingong gikuha nga walay pagtugot niya.
Human masuta sa mga otoridad nga adunay unang report ug kaso nga napasaka sa Cebu City, dali nilang gisubay ang suspek. Nasakpan kini nga nagmaneho sa maong motorsiklo sa Sitio Dakit, Barangay Poblacion, hinungdan sa usa ka pag-gukod sa kapulisan.
Atol sa pag-ikyas, nawad-an og kontrol ang suspek sa iyang gimanehong motorsiklo human mabangga sa kanal sa daplin sa dalan. Nahulog kini ug gibiyaan ang motorsiklo samtang midagan palayo. Giingong gilabay usab niya ang usa ka .38 caliber revolver nga adunay tulo ka buhing bala.
Pinaagi sa tabang sa mga residente sa lugar, nadakpan sa mga pulis ang suspek ug narekober ang pusil ug ang giingong gi-karnap nga Honda Click 125. Gidala ang suspek ug ang mga nakompisar nga ebidensya ngadto sa Pinamungajan Municipal Police Station alang sa hustong dokumentasyon ug pagpasaka sa angay nga mga kaso.
Gidayeg ni CPPO Provincial Director PCOL Abubakar Udang Mangelen Jr. ang mga operatiba sa ilang paspas nga aksyon. Matud pa niya, ang kalampusan sa operasyon nagpakita sa kamahinungdanon sa padayon nga police visibility ug checkpoint operations aron mapugngan ang kriminalidad ug mapanalipdan ang kaluwasan sa komunidad. Gipasalamatan usab niya ang kooperasyon sa mga lumulupyo nga nakatabang sa pagdakop sa suspek.
I via Renante Socia Lada