Samtang nagsugod na ang klase alang sa Balik Eskwela 2026, nagpahinumdom ang Cebu Provincial Police Office (CPPO) sa mga estudyante, ginikanan, ug magtutudlo nga unahon kanunay ang kaluwasan ug seguridad sulod ug gawas sa eskwelahan.
Gidasig sa CPPO ang mga estudyante nga magmatngon sa ilang palibot ug sigurohong luwas ang ilang personal nga mga gamit. Gipahinumdoman usab sila sa pagsunod sa mga balaod sa trapiko ug mga lagda sa eskwelahan aron malikayan ang mga aksidente ug uban pang peligro.
Gipasidan-an usab ang mga estudyante nga dili makig-istorya o modawat og mga regalo gikan sa mga dili kaila nga tawo. Kon adunay kadudahang kalihokan, kinahanglan kini dayong isumbong sa mga magtutudlo, ginikanan, o mga otoridad aron malikayan ang posibleng krimen.
Dugang pa, gi-awhag sa kapulisan ang responsableng paggamit sa social media ug ang pagpanalipod sa personal nga impormasyon online. Matud pa sa CPPO, importante ang panaghiusa sa mga ginikanan, eskwelahan, komunidad, ug kapulisan aron masiguro ang luwas ug malinawon nga palibot alang sa tanang estudyante. Ang edukasyon, matud pa nila, mas molambo kung adunay kaluwasan ug seguridad sa matag eskwelahan.
I via Renante Socia Lada