Nagpadayon ang Cebu Police Provincial Office (CPPO) sa ilang kampanya batok sa kriminalidad ug nakab-ot ang daghang kalampusan sa mga operasyon gikan Hulyo 20 hangtod 26, 2026. Tumong sa CPPO nga mapadayon ang kalinaw ug kaluwasan sa mga lumulupyo sa tibuok lalawigan sa Sugbo.
Sa kampanya batok sa ilegal nga drogas, nakapahigayon ang kapulisan og 32 ka operasyon ug nadakpan ang 39 ka mga suspek. Nakasakop usab sila og 137.93 gramos nga gituohang shabu nga adunay balor nga ₱937,924, ug nakapasaka og 65 ka kaso sa korte.
Sa laing operasyon, nadakpan usab ang 30 ka wanted person, lakip ang 6 ka Most Wanted Person. Samtang sa kampanya batok sa ilegal nga armas, lima ka tawo ang nadakpan, lima ka armas ug usa ka eksplosibo ang nakompiskar, ug tulo ka armas ang boluntaryong gitugyan pinaagi sa Oplan Katok.
Padayon usab ang operasyon batok sa ilegal nga sugal diin 32 ka tawo ang nadakpan ug 26 ka kaso ang nasaka. Nakompiska usab ang kapulisan og ₱8,554 nga kuwarta nga gigamit sa pagpusta.
Gipalig-on usab sa CPPO ang pagpatuman sa mga lokal nga ordinansa pinaagi sa 1,855 ka operasyon. Niini, 2,905 ka mga nakalapas ang gipamulta ug 1,151 ka tawo ang gipasidan-an. Matod ni PCOL Abubakar Udang Mangelen Jr., magpadayon ang CPPO sa hugot nga pagpatuman sa balaod aron masiguro ang kalinaw ug kaluwasan sa tanang Sugboanon.
I via Renante Socia Lada