Patay ang usa ka 4 anyos nga batang babaye, samtang naangol ang iyang 7 anyos nga uyoan sa sunog nga nahitabo sa usa ka balay sa Sitio Caolong, Barangay Campo 4, Talisay City niadtong Sabado sa hapon.
Sa imbestigasyon sa Bureau of Fire Protection (BFP), nahibaw-an nga naa sa ikaduhang andana ang duha ka bata sa dihang mibuto ang kalayo. Nakalingkawas ang 7 anyos pinaagi sa pag-ambak gikan sa bintana, apan nahabilin sa sulod ang 4 anyos nga natulog pa.
Naningkamot ang inahan sa biktima nga makasulod aron maluwas ang iyang anak, apan napugngan siya tungod kay naka-lock ang pultahan. Miagi na lamang siya sa bintana sa kwarto ug nakuha ang bata, apan grabe na kini og paso sa lawas.
Gidali pagdala ang bata sa ospital aron matambalan, apan wala na kini matabangi ug gideklarar nga patay sa mga doktor.
Sulod sa 12 minutos napalong sa mga bombero ang kalayo. Padayon pa ang imbestigasyon sa BFP aron matino ang tinuod nga hinungdan sa sunog, lakip ang posibilidad nga pag-overheat sa usa ka electric fan.
I via Renante Socia Lada