Padayon ang Cebu Police Provincial Office (CPPO) sa ilang Safer Cities Initiative, diin 543 ka tawo ang nadakpan atol sa 247 ka operasyon batok sa kriminalidad sa tibuok Lalawigan sa Sugbo kagahapon Hulyo 26, 2026.
Sumala sa CPPO, ang operasyon nagtumong sa pagpatuman sa mga lokal nga ordinansa aron mapadayon ang kalinaw ug kahapsay sa mga komunidad. Sa 543 ka nadakpan, 436 ang gipamulta ug 107 ang gipahimangnoan. Mokabat sa ₱148,850 ang nakolektang multa.
Kadaghanan sa mga paglapas mao ang 436 ka kaso sa traffic nga ordinansa, 44 ka kaso sa pag-inom og ilimnong makahubog sa publiko, 41 ka menor de edad nga nakalapas sa curfew, 11 ka kaso sa pagpanigarilyo sa pampublikong lugar, 9 ka tawo nga nagsuroy nga walay sapot sa ibabaw, ug 2 ka kaso sa karaoke nga milapas sa gitakdang oras. Walay natala nga kaso sa vandalism, pagsul-ob og balaclava, ug pagbabag sa road-clearing operations.
Matud pa ni CPPO Director PCOL Abubakar Udang Mangelen Jr., ang maong kampanya makatabang sa pagpadisiplina sa mga residente ug pagpugong sa krimen. Miingon siya nga magpadayon ang ilang pakigtambayayong sa mga lokal nga panggamhanan ug sa publiko aron masiguro ang kalinaw sa lalawigan.
Gidayeg usab ni PRO-7 Director PBGEN Arnold Evangelista Abad ang CPPO tungod sa ilang padayon nga maayong trabaho. Gipasalig sa CPPO nga ipadayon nila ang ilang mga operasyon aron mapabiling luwas ug malinawon ang mga komunidad sa Sugbo.
I via Renante Socia Lada