Human sa nahitabong pagpanulis sa duha ka mga Pawnshop didto sa Calderon St., Barangay Ermita, Dakbayan sa Sugbo, pasado alas 11:00 kagahapon sa buntag, Agosto 8, 2024 dali gyud dayon nisusi ang kapulisan sa Cebu City Police Office (CCPO) ug si Acting Mayor Raymond Alvin Garcia.
Ang CCPO nilusad og Oplan Universe pinaagi sa kamanduan sa City Director nga si Police Colonel Antoniette Cañete, diin ipatuman ang hugot nga checkpoint sa mga kadalanan sa tanang lugar sa dakbayan sa Sugbo.
Mahinomduman nga ang DGC D’ Gold Chain Jewelry Store ug Macy’s Gold and Silver dungan nga gitulis sa gi bana- bana nga 6 ka mga tawo nga pulos nakahelmet ug luwan sa mga motorsiklo.
Pulos kini mga armado nga kursonada kaayo nihimo sa maong pagpanulis dala ang gi bana-bana nga P14 milyones nga balor sa mga alahas.
Sa pagkakaron nakig alayon na usab ang CCPO sa ubang mga Police Station sa Sugbo aron dali nilang madakpan ang mga tulisan.
Samtang si Acting Mayor Garcia nimando sa CCPO nga sulbaron kining pagpanulis sulod sa 48 oras.
Sa niaging tuig usab minilyon nga mga alahas ang nadala sa mga tulisan human malampuson nilang natulis ang Oro Sugbu Pawnshop. (Renante Socia Lada)