Kinasing-kasing nga nanawagan si Cebu City Mayor Mike Rama sa mga Sugboanon nga mag-ampo alang sa pagbunok sa uwan.
“Ampo. Ampo. Ayaw undang og ampo nga moulan…. That is why I thank (Cebu) Archbishop (Jose) Palma for the Oratio Imperata,” pamahayag ni Rama atol sa flag-raising ceremony gawas sa Cebu City Hall kagahapong adlawa, Abril 29, 2024.
Nunot kini sa grabing kainiton sa panahon nga apiktado na kaayo ang mga tawo sa Sugbo tungod kay walay igong supply sa tubig na magamit.
Dugang sa Mayor nga atol sa iyang pagbesita sa mga bukirang barangay sa siyudad sa Sugbo iyang nakita nga nangadaot na pag-ayo ang pananom sa mga mag-uuma.
Nanghatag usab ang kagamhanan og mga kagamitan sama sa baril ug hose nga magamit sa mga mag-uuma punduhanan sa tubig.
Ang Sugbo nakasinati og grabing kainiton na ang heat index niabot na sa 40°C segon sa PAGASA.
Gipahinomduman usab ni Mayor Rama ang mga mag-uuma sa kabukirang Barangay nga mananom og kahoy aron makatabang sa pagpahiuli sa kahimtang sa kalikopan ug sa kinaiyahan. (Renante Lada)
(Source: Cebu City PIO)