Gihangyo ni Mayor Raymond Alvin Garcia ang mga miyembro sa Hotel, Resort & Restaurant Association of Cebu, Inc. (HRRAC) nga dili magpalabi og pagpasaka sa presyo sa ilang mga serbisyo atol sa Sinulog 2025 Jubilee Year.
Ang maong hangyo gibutyag ni Mayor Garcia sa iyang press conference kagahapon, Disyembre 10, 2024, sa Cebu City Hall.
Matod sa mayor, gilauman ang pagdagsa sa mga tawo alang sa Sinulog, nga sama sa nahitabo sa Fuente Osmeña rotunda sa niaging semana atol sa pagsiga sa ML Christmas Tree of Hope. Ang maong kalihokan nigawas nga grabe ka dagsaon ug nakapahinay sa daloy sa trapiko.
Segon usab sa mayor nga sa nilabay nga duha ka tuig, niminus ang hotel bookings sa Cebu City matag Enero. Apan karong tuiga, tungod sa pagbabalik sa Sinulog Grand Parade sa Cebu City Sports Center, dako ang posibilidad nga puno na ang mga hotel bookings para sa sunod buwan.
“Karon I’m happy nga a lot of these hotel owners are recovering now kani nga Sinulog. And I’m hoping nga fully booked sila para makabawi-bawi sad sila sa prior years, previous years nga wala gyud sila makapapuno sa ilang mga kaugalingong hotel on a January,” matod ni Mayor Garcia.
Gidugang niya nga gawas sa kalampusan sa mga kalihokan, nagpaabot siya nga mahimong mabinungahon usab ang Sinulog alang sa mga negosyante, ilabi na ang sektor sa hotel ug turismo.
“So, I’m hoping and praying that it will be a successful Sinulog, not only for the participants but also for the business owners, like our own hotels,” dugang sa mayor. (Renante Socia Lada)
(Source: Cebu City PIO)