Gikan sa kanhing dunay pinakadaghang malnourished children sa Zamboanga Peninsula, ikatulo na lang karon ang Zamboanga del Norte nga dunay labing taas nga kaso sa malnutrisyon sa Rehiyon 9.
Si Mr. Noah Vincent D. Gallo, Nutrition Officer-1 sa Provincial Nutrition Office mibutyag niining maong impormasyon sa gipahigayong 4th Quarterly Meeting sa Provincial Nutrition Committee sa plenary hall sa ikaduhang andana sa Zamboanga del Norte Convention and Exhibition Center nga nahimutang sa Barangay Estaka ning Dakbayan sa Dipolog.
Subay sa report sa National Nutrition Council-9 on Nutritional Status of 0-59 months old Pre-School Children Region 9, 2024-Weight for Age, sa tulo ka mga lalawigan sa rehiyon 9, nag-una ang Zamboanga del Sur nga dunay pinakadaghang underweight ug severely underweight nga 6.54%, ikaduha ang Zamboanga Sibugay-3.81% ug ikatulo lang ang Zamboanga del Norte nga dunay 3.15%.
Sa mensahe ni Governor Rosalina “Nanay Nene” Jalosjos, Chairman sa Provincial Nutrition Committee nga gibasa ni Ms. Anna S. Marfil-Assistant to Executive Assistant-IV-PHO, Ms. Annabelle Jalosjos, gipahalipayan sa gobernador ang tanang membro sa komiti nga nahimong instrumental sa pag-ubos sa kaso sa malnutrisyon dinhi sa Zamboanga del Norte.
“Pinaagi sa ensaktong nutrisyon, kining mga bataa mahimong mahimsog ug produktibong membro sa katilingban,” matod pa ni Govenor Jalosjos. Gihatagan ug punto ni Governor Jalosjos nga ang maayong panglawas ug nutrisyong nagpabiling nag-unang prayoridad sa iyang administrasyon, isip tipik sa 5-point agenda nga gitutokan sa iyang administrasyon.
Ang maong miting nga gipangunahan ni Provincial Nutrition Action Officer ug PSWDO Head Mr. Alex mituki usab sa gisugyot nga komposisyon sa Provincial Nutrition Committee ug ang ilang mahimong papel sa pagsiguro sa mahimsog nga kabataan sa Zamboanga del Norte. (Angelica T. Obina)
(Source: PIC-ATRuda)