Cebu City – Gibuksan sa kadagkoan sa panglawas sa Sugbo gahapon ang ceremonial rollout sa bakuna sa Pfizer-BioNTech.
Labing minos 60 ka tawo ang miapil sa seremonya nga gipahigayon sa bag-ong vaccination site sa Cebu City – ang University of Cebu o UC-Senior High Campus sa dan J. Alcantara, Brgy. Sambag 1.
Ang Department of Health o DOH-7 ug ang City Health Office ang nangu sa kalihokan.
Si Dr. Jeffrey Ibones, OIC sa CHO, miingon nga sa maong event, 60 ka doses ang ilang gigamit kay sa usa ka vial, unom ka doses ang sud.
Suma pa ni Ibones, kadtong nakadawat sa unang shot sa Pfizer vaccine gilista pinaagi sa city’s online vaccination registration site.
Sila ang mga tawo nga giklasipikar ubos sa A1 o medical front-liners, A2 o senior citizens, ug A3 o persons with co-morbidities ubos sa Philippine National Deployment Plan.
Ang Central Visayas nakadawat og 29 mil ka doses sa bakuna sa Pfizer-BioNTech sa miaging semana isip unang batch nga nadawat sa rehiyon.
Sa maong gidaghanon, matod ni Ibones, 5,800 ang gitagana sa Cebu City. (Jhon Tadlip/JTY)
(Source: City Health Office-Cebu City, photo courtesy of Cebu City Public Information Office)