Mibisita ang Cebuano actor ug sportsman nga Paul Jake Castillo kang Gob. Pamela Baricuatro sa Capitol niadtong Marso 17 aron ipakita ang posible nga suporta sa pribadong sektor sa plano sa probinsya nga buhion pag-usab ang sports program.
Gisundan si Castillo sa iyang asawa nga si Kaye Abad atol sa maong courtesy visit.
Gihisgutan nila ang posibilidad nga gamiton ang sports isip paagi aron mapalambo usab ang turismo sa Cebu Province.
Sumala kang Castillo, dako ang potensyal sa Cebu nga mahimong sentro sa mga sports activities nga makadani og lokal ug foreign nga mga partisipante.
Kini makatabang sa ekonomiya ug sa pagpalig-on sa komunidad.
Nagpasalamat usab si Gob. Baricuatro sa suporta ni Castillo ug giingnan nga makatabang pa siya pinaagi sa pag-promote sa mga sports activities sa probinsya, sama sa fun run nga planong ipahigayon karong Agosto alang sa anti-hunger programs.
Ang pagpalig-on sa sports program sa probinsya nasuportahan usab sa Executive Order No. 45 nga nag-reorganize sa Cebu Provincial Sports Commission. Ang maong komisyon maoy mangulo sa pagpatuman sa mga programa sa sports ug physical fitness sa tibuok probinsya.
Gilauman nga pinaagi sa maong mga lakang, mas mapalig-on ang grassroots sports, maorganisar ang mga kompetisyon, ug mas mapauswag ang kahimsog ug kalamboan sa mga Sugbuanon.
Source: Cebu Province PIO
I via Renante Socia Lada